Колішняя сядзіба размяшчаецца ва ўрочышчы Юліна, што паміж вёскамі Агарэвічы і Шашкі. Захаваліся рэшткі пейзажнага парку плошчай 2,5 га. Асноўны дрэвастой складаюць граб, бяроза, клён, каштан, шыпшына, бэз і інш. Па перыферыі парку існавалі каналы, якія былі звязаны з сажалкай. Цяпер каналы абмялелі, сажалка зарасла. Захаваліся рэшткі ўязной мураванай брамы. Парк быў закладзены ў другой палове ХІХ стагоддзя. Пасля Вялікай Айчыннай вайны ў сядзібна-паркавым ансамблі размяшчаўся школьны лагер, будынкі якога пазней былі аддадзены пад жыллё. Сядзібны дом быў пабудаваны разам з закладкай парку. Будынак драўляны, аднапавярховы, у плане меў форму прамавуголніка з невялікім ганкам, высокім дахам, накрытым гонтай. На месцы дома засталіся разбураныя падмуркі, а побач захаваўся склеп. Пры пабудове памяшканняў школьнага лагера сядзібны дом і гаспадарчыя аб'екты былі разабраныя.