З назваю вёскі Чудзін, у якой у 1951 годзе нарадзіўся Алесь Каско, у паэта, натуральна, шмат успамінаў і не менш мастацкіх асацыяцый. У адным з вершаў-прысвячэнняў роднай вёсцы наш зямляк піша: "Калі не цуд, што мой выток, мой Чудзін — палескіх казак даўні чарадзей". Сапраўды, хто не ведае на Ганцаўшчыне вядомых казачнікаў Рэдкага, Данілы Куляша і Дудара, якія папоўнілі фальклорную скарбніцу беларускага народа цудоўнымі творамі?!

Ганцаўшчына зусім не выпадкова стала гаспадыняй сёлетняга беларускага свята пісьменства. У першую чаргу, дзякуючы багатай літаратурнай спадчыне і непарыўнасці культурных традыцый, творчасці мастакоў слова розных пакаленняў, наш палескі куточак набыў вядомасць у рэспубліцы як адметны, арыгінальны і шчодры на таленты рэгіён. Цяжка не пагадзіцца з галоўным рэдактарам раённай газеты Канстанцінам Мохарам, які ў кнізе "Паміж Бобрыкам і Ланню" тлумачыць гэты феномен унікальнымі па сваім багацці і змястоўнасці духоўнымі вытокамі краю: чароўнымі казкамі чудзінскіх, дасціпных на народнае слова здольнікаў Данілы Куляша і Дудара, збіральніцкай дзейнасцю фалькларыста этнографа Аляксандра Сержпугоўскага, плёнам працы і творчасці на Ганцаўшчыне беларускага песняра Якуба Коласа. Удзячныя нашчадкі, сучасныя пісьменнікі-землякі з гонарам усведамляюць сваю прыналежнасць да духоўнай скарбніцы радзімы.

Сёлета 25 жніўня Васілю Фёдаравічу, аднаму з першых журналістаў Ганцаўшчыны, які пачынаў супрацоўнікам, а потым працяглы час рэдагаваў (1966 — 1987 гг.) раённую газету, споўнілася б 85 гадоў.

"М.Рудкоўскі, пры ўсёй сціпласці яго натуры, стаў прыкметным у слаўнай плеядзе паэтаў, чые душы заўчасна разбудзіла вайна, апякла іх вогненнымі зорамі і гартавала слязамі матак і ўдоў, прозай галоднага і халоднага пасляваеннага бытавання".